Премини на содржината

Осврт на Скопје Прајд 2023

И четвртата скопска Парада на гордоста ја одбележаа силните и храбри пораки за еднаквост, достоинство и љубов. Нашата актуелна реалност е преполна со омраза, насилство и агресија кон ЛГБТИ заедницата, особено со засилените антиродови движења, но улиците на Скопје на 24 јуни беа преполни со насмеани и позитивни луѓе, припадници на ЛГБТИ заедницата и поддржувачи, кои маршираа заедно обединети во борбата за еднакви права за сите.

Од оваа година, Парадата се отвори како платформа и за многу други каузи и групи кои сакаа својата порака да ја пренесат на јавноста, да бидат повидливи и препознаени со своите обележја.

Почетната точка, како и претходните години беше паркот „Жена-борец“, од каде беа испратени главните пораки на Прајдот. Свои обраќања имаа активистката Лила Милиќ и претставникот на Партијата на Зелените од Германија, Мина Џек, како и мајката на геј момче, Славица Гајдаѕис Кнежевиќ која гордо го изоди маршот за еднаквост на ЛГБТИ луѓето.

Трансродовата активистка, Лила Милиќ, рече дека и таа се залага за семејни вредности, но не и за омраза.

„Противниците на ЛГБТ заедницата мислат дека семејни вредности се да ги мразиш различните, мажот да одлучува и да ги контролира жената и децата во семејството, да се однесува насилно и тоа да му се простува. Не, тоа не се семејни вредности во демократско општество“, громогласно говореше Милиќ.

Емотивно зборуваше и Славица Гајдаѕис Кнежевиќ, психијатар и мајка на геј син. Им порача на родителите да не ги осудуваат своите деца, туку да ги прифатат онакви какви што се.

„Сексуалната ориентација и родовиот идентитет не се избор на нашите деца. Тие не избираат да се различни. Тие се едноставно различни“, кажа таа.

Мина Џек Толу, транс-активист и член на комитетот на Европските Зелени ги сподели своите искуства со говорот на омраза како транс лице, но и политичар, зборуваше за улогата на Зелените во борбата за човековите права. Инспиративно говореше за Малта, од каде што потекнува и каде од 2015 година законите ги признаваат транс луѓето што им овозможува подостоинствен живот.

И оваа година се маршираше во попладневните часови, низ центарот на Скопје, а крајната точка беше Стадионот на АРМ во Градскиот парк. Програмата на Парадата со свои настапи ја збогатија големата македонската музичка ѕвезда, Тамара Тодевска, како и прекрасните Дејан Сламков, Vinya, Ронда Ву, Iggy Mona Asentra, Daria Buffy, Fendy Mama, Zoi Plastic, Alexis VanderCunt, Sunnoka, Loakiin, Виолета Качакова, Galatheia и Stefan Strange.

Организациониот одбор на четвртата скопска Парада на гордоста им благодари на сите граѓани коишто со лично присуство придонесоа да се создаде величествена атмосфера на заедништво и солидарност, наспроти бројните изливи на омраза, кои се придружен дел од сите случувања за видливост на ЛГБТИ заедницата. Скопје Прајд како настан кој ги отфрла прангите на стигмата, на системското и семејното насилство, ги надвладеа сите зборови полни со омраза и нетрпеливост без оглед дали тие доаѓаат од страна на политичари, медиумски работници или од социјалните мрежи.

Најголеми пофалби упатуваме до волонтерите, кои безрезервно се вложија во организацијата на Парадата и на промотивните настани. Изразуваме благодарност до Министерството за внатрешни работи, чии припадници и годинава високо професионално го обезбедуваа Прајдот, како и до Министерството за одбрана, кое ни овозможи да го користиме армискиот стадион за забавниот дел од програмата.

Скопје Прајд 2023 беше поддржан од Фондацијата Отворено општество Македонија и Фондациите Отворено општество Западен Балкан, Амбасадата на Соединетите Американски Држави и Амбасадата на Република Франција во Република Северна Македонија, Sigrid Rousing Trust, Civil Rights Defenders, Фондација Заев – Едно општество за сите, Мелон Технологии.

е-Билтен

Регистрирајте се на нашата мејлинг листа за да бидете во тек со новините и активностите

Забелешка: На вашата е-пошта ќе стигне порака од нас со линк на кој треба да кликнете за да ја комплетирате регистрацијата.

Апликација за волонтер

За почеток, претставете ни се.
Како можеме да ве контактираме?
Кои се вашите вештини и интереси?